Кыргыз Республикасынын Маданият, маалымат, спорт жана жаштар саясаты министрлигине караштуу
Т.АБДУМОМУНОВ АТЫНДАГЫ КЫРГЫЗ УЛУТТТУК АКАДЕМИЯЛЫК ДРАМА ТЕАТРЫ
Т.Абдумомунов атындагы КУАДТ
Кыргыз эл жазуучусу, Токтогул атындагы мамлекеттик сыйлыктын лауреаты, драматург Токтоболот Абдумомуновдун 100 жылдыгына карата ТүркСОЙ эл аралык уюму 2022-жылды “Токтоболот Абдумомуновдун жылы» деп жарыялады. Анын алкагында Т.Абдумомунов атындагы Кыргыз улуттук академиялык драматеатры жазуучунун калемине таандык “Карагул ботом” притчасын сахналаштырып, 2022-жылдын 15-сентябрында премьерасын өткөрдү. Бет ачарга КР маданият, маалымат, спорт жана жаштар саясаты министринин орун басары Түмөнбай Колдошов, КР маданият, маалымат, спорт жана жаштар саясаты министрлигин алдындагы Улуттук адабиятты өнүктүрүү борборунун төрагасы, КР эл акыны Кожогелди Култегин, ЖКнын 4 жолку чакырылышынын депутаты, коомдук жана саясий ишмер, жазуучу Каныбек Иманалиев, КР Улуттук жазуучулар союзунун төрагасы Нурлан Калыбеков баштаган кыргыз интеллигенциясынын өкүлдөрү катышты.
“Карагул ботом” притчасы тээ бир байыркы жоокер заманда уруулар уруу менен чабышып, ат үстүндө эрлер өлүп, бешенеге жазылса, бешиктеги балдар өлгөн коогалаң доордо жашаган элдин турмушу, ошол доордо бир урууну жалгыз баккан Карыпбай аттуу көзгө атар мергенчинин тагдыры, сүйүүсү, трагедиясы, артымдан туяк калтырам деп тарткан азабы, муң-кайгысы тууралуу баяндалат. Карыпбайдын эки уулу доодо, эки уулу жоодо өлүп кабыргасы кайышат. Канаттары кыркылып, каңгырап жалгыз калган мергенчи алтымышка таяганда Карагул аттуу уулдуу болуп, карыганда көргөн жалгызын кесепет-кырсыктан сактайм, тукумумду улачу тумарым болсун деп, элден безип, тоо арасын түнөк кылып, көчүп кетет.
Спектакль жаш муундарды, деги эле адам баласын жаратылышты сүйүүгө, табият менен таттуу мамиледе болууга, бейкүнөө жаныбарларга кол салбоого, бүткүл дүйнөнү санаага салып турган жалпы планетанын глобалдык көйгөйлөрүнун бири болгон экологияны сактоого үндөйт.
Коюучу топ:
Режиссер-коюучу – Н.Мендебаиров, КР эмгек сиңирген артисти
Сүрөтчү-коюучу – С.Ниязакунов
Музыкалаштырган – Ы.Усманов
Балетмейстер – Ж.Исакова
Поэтикалык текст – Н.Рыскул кызы
Костюм боюнча сүрөтчү – З.Мукамбетова
Режиссердун ассистенти – Д.Жанжигитов, Токтогул атындагы сыйлыктын лауреаты
Режиссердун жардамчысы – Э.Жумалиева
Ролдордо:
Карагул – С.Калыбек уулу, арт.
Карыпбай – А.Болорбек уулу, арт.
Сырга – А.Кыйыкбаева, КР эмгек сиңирген артисти
Шаа мүйүз – Г.Каниметова, КР эл артисти, Токтогул атындагы сыйлыктын лауреаты, К.Сейдалиева, КР эл артисти
Сынык мүйүз – КР эл артисттери Ж.Сыдыкбаева, А.Назаркулова
1-улак – Ө.Израилов, арт.
2-улак – А.Шерикул уулу, арт.
3-улак – Ж.Талантбек уулу, арт.
4-улак – Ж.Касейинов, арт.
Улуттук театрга 1997-жылы 10-декабрда дал ушул улуу инсан,кыргыздын биринчи профессионал драматургу Т.Абдумомуновдун ысымы ыйгарылган. Ошол күндөн ушул күнгө чейин театр Токтоболот Абдумомуновдун атындагы театр аталып, сыймыктануу менен иш алып барып келет.